Manghobasi, Ndada
Sihobasan
Patujolo
“Ise ma na lomo rohana, molo ingkon gabe parhobas
di halak na asing?” On ma pandohan si Plato, sahalak filsuf ni Junani na
tarbarita i. Sian pandohan on, tarida do kejujuran i si Plato martimbangkon
torop halak na jotjot mandok rade ibana gabe parhobas hape molo di praktekna, “Ai
ise huroha ho? Na hatobanmu do ahu?”
Parhobas
Ni Huria ≠ Parhobas Ni Negara
Hata “parhobas” marharoroan sian ulaon adat
ni halak Batak. Di ganup ulaon adat ni halak Batak ingkon adong do parhobas, ia
ulaonna paradehon sipanganon dohot siinunom ni hasuhuton dohot angka natorop di
ulaon i. Laos pandohan i ma na pinangke ni huria na marhata Batak laho
manggoari angka na martohonan di huria.
Ulaon marhobas, sada ulaon na lea do on
molo dihadirion. Ala parhobas ingkon do tumoru parhundulna sian angka na
hinobasan. I do umbahen molo di habatakon, boru do na gabe parhobas di ulaon ni
hulahulana. Ala tumoru do parhundul ni boru i sian hulahula-na. Suang songon i do
nang parhobas ni huria, ingkon tumoru do parhundulna sian na hinobasanna, tumoru
sian Tuhan Jesus dohot sian ruas ni huria i.
Tudosan ni hata “parhobas” di hata
Indonesia; “pelayan”. Ulaonna tudos do tu parhobas di hata Batak, manghobasi
parmanganon. Laos pandohan i ma na pinangke ni negara laho manggoari angka na
martohonan di negara (pegawai negeri), di goari do nasida “Pelayan Masyarakat/Negara”
manang “Abdi Masyarakat/Negara”. Alai molo pe digoari nasida “Pelayan
Masyarakat/Negara”, ndang gabe sisurusuruon ni masyarakat anggo pegawai negeri
ala digoari do nang nasida i “pamarenta” (pemerintah). Nasida do na mamarenta
sihobasanna, alani i timbo do anggo parhundul ni parhobas ni negara.
Alai jotjot do ditiru parhobas ni huria i parhundul
ni parhobas ni negara, dirajumi angka parhobas ni huria i do dirina songon pamarenta,
na sai naeng mamarenta sihobasanna. I do umbahen sai adong jumpang di angka
parhobas ni huria na sai naeng lomolomo ni rohana mangulahon ulaon parhuriaon,
na sai naeng guru dokna na saut, na so olo manangihon soara ni ruasna. Hape
sasintongna, tudos songon hatoban do anggo ulaon ni parhobas ni huria,
mangulahon parenta ndada mamarenta. Parenta ni ise? Parenta ni Tuhan Jesus,
uluan ni huria i dohot parenta ni ruas ni huria i (mangulahon hasil keputusan
jemaat).
Tuhan Jesus Do Tiruan Ni Parhobas Ni Huria.
Suang songon i do na masa di turpuk on,
dirajumi si Jakobus dohot si Johannes do huroha ia Harajaon ni Debata i tudos
tu harajaon ni portibi, umbahen dipangido nasida parhundul na sangap tu Tuhan
Jesus. Asa marsihundul nian nasida nadua di siamun dohot di sihambirang ni
Tuhan Jesus di harajaon i.
Alai aha ma alus ni Tuhan Jesus tu nasida
na dua? “Ndang diboto hamu na
pinangidomuna i.” (ayat 38). Alus on naeng mandok; ia harajaon ni Debata
asing do dohot harajaon ni portibi on. Jut do roha ni Tuhan Jesus di pangidoan
ni si Jakobus dohot si Johannes sisolhotNa i. Ai gabe hasangapon do hape na jinalahan
nasida nadua di na mangihuthon Ibana.
Didok Tuhan Jesus ma muse manguduti, “Alai na mambahen hundul tu siamunHu dohot
tu hambirangKu, ndang guru di Ahu i; di angka naung dirade hian do i.” (ayat
40). Hata on ndada laho patoruhon huaso ni Tuhan Jesus, na so tuk huasoNa laho
patupahon songon na pinangido ni si Jakobus dohot si Johannes. Alai naeng
mandok ndada alani sisolhot ni Tuhan i nasida umbahen gabe boi nasida nadua
hundul di siamun dohot di hambirang ni Tuhan Jesus. Alai sian parbue ni ulaonna
i do halak boi gabe marsihundul disi.
Sada petunjuk dilehon Tuhan Jesus songon
dalan molo naeng marsangap angka siseanNa i. Didok Tuhan Jesus tu nasida, “…Manang ise hamu na giot sangap, i ma gabe
pangoloi di donganna! Manang ise hamu, na naeng parjolo, i ma gabe naposo ni
donganna saluhutna.” (ayat 43-44).
Harajaon ni Debata asing do sian harajaon
ni portibi. Molo naeng sasahalak marsangap di harajaon ni portibi ingkon hundul
ma ibana di sada inganan na timbo di pamarentaon. Alai baliksa, molo di harajaon
ni Debata, molo naeng marsangap sasahalak ingkon gabe hatoban ni donganna do
ibana. Gabe mandao do tutu angka natorop molo dung tuat angka pamarenta sian
parhundulna na timbo i, alai sai tongtong do dihaholongi angka na torop angka
na olo gabe hatoban ni donganna. Sai ingoton ni natorop i do goarna, maol
longkang sian roha. Diparsangapi do sahat ro di naung mate pe.
Ganup parhobas ni huria, ingkon do
patutoruhon dirina di adopan ni sihobasan-na. Ingot ma ibana, ndada pamarenta
ibana alai hatoban do ibana di huria i. Ndada lomolomo ni rohana di huria alai
ingkon mangulahon lomo ni nampuna huria do, i ma Tuhan Jesus Kristus. Ingkon
Tuhan Jesus i ma tiruan di ibana mangulahon tohonanna, “Ai nang anak ni jolma i
pe, ndada asa dioloi halak Ibana, umbahen na ro; Ibana do balik pangoloi jala
mangalehon hosaNa bahen tobus ni torop jolma.” (ayat 45). Amen.
Pdt.
Anthony L Tobing
0 komentar:
Posting Komentar